AQSh sudi Spirit Airlines maʼlumotlarini Googleʼga sotishni maʼqulladi
Google maxfiylikni himoyalashni kuchaytirish majburiyatidan soʻng Spirit Airlines ichki maʼlumotlarini $10 mln ga oladi. Bitimni Nyu-York bankrotlik sudi maʼqulladi.

Nyu-York federal bankrotlik sudi Googleʼga Spirit Airlines ichki maʼlumotlarini $10 mln evaziga sotishni maʼqulladi. Google maxfiy axborotni himoyalash boʻyicha qoʻshimcha choralarni joriy etishga rozi boʻlgan. Bitimga kasaba uyushmalari va 120 nafardan ortiq AQSh qonunchilari qarshi chiqdi.
Spirit Airlines shu yil bahorida faoliyatini toʻxtatdi. Yozda aviakompaniya aktivlarini tugatish jarayonida Google kompaniya maʼlumotlari auksionida gʻolib chiqdi. Paketda elektron xatlar, chatlar, OneDrive va SharePoint fayllari, qoʻllab-quvvatlash xizmatiga qoʻngʻiroqlar yozuvlari, ServiceNow soʻrovlari, parvozlar, yoqilgʻi va ehtiyot qismlar xaridiga oid arxivlar hamda ekipaj maʼlumotlari bor. Google ulardan mahsulotlar ishlab chiqish va sunʼiy intellekt modellarini oʻqitishda foydalanmoqchi.
Oktabrda maʼlumotlarni himoyalash boʻyicha ombudsman mijozlarning shaxsiy maʼlumotlari chiqarilgach, bitimni maʼqullashni tavsiya qildi. Qonunchilar paketdan xodimlar haqidagi maʼlumotlarni ham imkon qadar olib tashlashni soʻrashdi; ularning aytishicha, unda yuzlab million elektron xat va Microsoft Teams xabarlari bor. Noyabrning birinchi yarmida Google bort kuzatuvchilari kasaba uyushmasi bilan kelishuv tuzdi. U xodimlarning ishga oid maʼlumotlarini shaxsiy maʼlumotlaridan ajratishni nazarda tutadi.



